दक्षिण अमेरिकाका दुई फुटबल हस्ती ब्राजिलका रोनाल्डिन्हो र अर्जेन्टिनाका हुँवा रोमन रिक्युल्मेले विमान दुर्घटनामा १९ खेलाडी गुमाएको ब्राजिलियन क्लब चापाकोइन्सेका लागि पैसा नलिई फुटबल खेल्ने प्रस्ताव अघि सारेका छन्। कुनै बेला अन्तर्राष्ट्रिय फुटबलमा आफ्नो खेल शैलीका कारण धाक जमाएका यी दुवै खेलाडीले क्लब फुटबलबाट सन्यास लिएका छैनन्।
तर, उनीहरू चापाकोइन्सेका लागि फुटबल खेल्दै आफ्नो लामो फुटबल करिअरबाट बिदा लिन चाहन्छन्। चापाकोइन्से हाल ब्राजिलको ‘ए’ डिभिजन लिगमा नवौं स्थानमा छ। कोलम्बियामा कोपा सुदामेरिकानाको फाइनल खेलेर फर्किएपछि यो क्लबले डिसेम्बर ११ मा एट्लेटिको मिनेरोविरूद्ध अन्तिम खेल खेल्नु पर्ने थियो।
तर, बुधबारको फाइनल खेलका लागि बोलिभियाबाट सोमबार राती उडेको लामिया विमान कोलम्बियाको मेडलिन शहरभन्दा अगाडि ला सेजाको डाँडोमा दुर्घटनाग्रस्त भएको थियो। जसमा चापाकोइन्सेका १९ खेलाडीसहित ७७ जनाको ज्यान गएको थियो। रोनाल्डिन्हो र रिक्युल्मेले मिलेर आफ्नो देशका लागि १ सय ४७ अन्तर्राष्ट्रिय खेल खेलेका छन्।
रिक्युल्मेले पछिल्लो पल्ट सन् २०१४ मा अर्जेन्टिनोस जुनियर्सबाट खेलेका थिए। अर्जेन्टिनाका पूर्व कप्तान रहिसकेका रिक्युल्मे अर्जेन्टिनाको ‘फुटबलर अफ दि इयर’ अवार्डबाट सम्मानित भइसकेका छन्। रोनाल्डिन्हो भने २००५ मा विश्व वर्ष खेलाडी घोषित भएका थिए। उनलाई यसै वर्ष ब्राजिलको फ्लुमिनेन्सले सात खेलपछि बर्खास्त गरेको थियो। उनी अमेरिकी लिग खेल्न जाने तयारीमा थिए। तर, यी दुवै खेलाडीले विमान दुर्घटनाका कारण खेलाडीबिहिन भएको चापाकोइन्सेको सम्मानमा फुटबल खेल्दै सन्यास लिने बताएका छन्।
source: setopati.com
No comments:
Post a Comment